Porsche frumsýnir framtíðina í París

skrifað föstudagur, 28. september, 2012
panamera_sportpanamera_sport

Bílasýningin í París stendur yfir þessa dagana. Sá bíll sem vakið hefur hvað mesta athygli þar á bæ er Panamera Sport Turismo. Hann er ný útfærsla af fjögurra sæta Porsche Panamera sem kallast Sport Turismo. Í honum er afhjúpuð framtíðarsýn Porsche sem felst í að fella saman í glæsilega hönnun, fullkomna Plug – In Hybrid tækni Porsche og öflugan vélbúnað frá fyrirtækinu. Óhætt er að fullyrða að aldrei hafi svo sportlegur bíll verið eins praktískur í notkun, þó svo að lúxusinn sé allt umlykjandi.

Tæknin er með hreinum ólíkindum: Hann er 416 hestöfl og á 6 strokka, þriggja lítra vélin 333 af þeim, en rafmótorar sem hlaða má úr heimilisinnstungu taka restina. Rafmagnið dugar bílnum fyrstu 30 kílómetrana og upp að 130 km hraða. Eyðslan er aðeins 3,5 lítrar á hundraðið og mengunin einungis 82 g/km af CO2. Bíllinn er undir 6 sekúndum í hundraðið. Það er klárt að með svo öflugan lúxusbíl sem eyðir aðeins 3,5 lítrum er Porsche greinilega að leggja línurnar fyrir framtíðina.