Bílabúð Benna tekur við Opel umboðinu af BL

skrifað mánudagur, 31. mars, 2014
Erna Gísladóttir forstjóri BL og Benedikt Eyjólfsson 
handsala samninginn.Erna Gísladóttir forstjóri BL og Benedikt Eyjólfsson handsala samninginn.

Bílabúð Benna hefur í samstarfi við General Motors (GM), framleiðanda Opel og Chevrolet, komist að samkomulagi um að Bílabúð Benna taki við umboði fyrir Opel á Íslandi.

„Jú það er rétt, Bílabúð Benna mun taka við Opel á Íslandi, enda Opel í eigu General Motors, sem einnig framleiðir Chevrolet. Bílabúð Benna tekur yfir alla þjónustu við Opel viðskiptavini á næstunni.“; sagði Skúli K. Skúlason, framkvæmdastjóri sölusviðs BL ehf., sem vill nota tækifærið og þakka öllum Opel viðskiptavinum BL fyrir ánægjuleg viðskipti á liðnum árum.

„Það eru spennandi tímar framundan fyrir Bílabúð Benna. Við höfum náð flottum árangri með Chevrolet á undanförnum árum og nú bætum við Opel í okkar vöruframboð. Við munum leggja áherslu á að veita Opel eigendum fyrsta flokks þjónustu hér eftir sem hingað til ásamt því að bjóða gott úrval bíla á samkeppnishæfum verðum. “ segir Benedikt Eyjólfsson, eigandi Bílabúðar Benna ehf.

Rætur Opel ná meira en öld aftur í tímann þegar Adam Opel lagði grunninn að fyrirtækinu. Í meira en 110 ár hefur Opel hannað bíla, undir einkunnarorðunum „Wir leben Autos“ eða „Við lifum fyrir bíla“. Opel eru vinsælir um allan heim og á einnig farsæla sögu hér á landi. Það má því segja að Opel, sem lifir fyrir bíla, eigi vel heima hjá Bílabúð Benna, sem hefur verið drifið áfram af einskærum bílaáhuga í tæplega 40 ára sögu fyrirtækisins.